LAOAG CITY – Nakagun-od ti world record ti maysa a lalaki idiay Idaho, U.S.A. gapu iti kabaelanna a mangpuyot kadagiti balloon usar laeng ti angin manipod iti agongna.
Kinumpirmaran ti records keeping organization a Guinness World Record a ni David Rush ti baro a world record holder ti titulo a “Most Balloons Inflated by Nose in 3 Minutes” kalpasan a nakapuyot ti 28 a lobo iti uneg ti tallo a minuto iti babaen ti agongna.
Saan a nagbalin nga alisto ken ni Rush a magun-od ti world record gapu ta dimmanon daytoy ti 42 attempts sakbay a naipaima ti titulo kenkuana.
Ni Rush ket maysa a serial record breaker ken kalikagumna a magun-od ti “Most Concurrent Guinness World Records Title Holder” iti panagngudo ita a tawen.
Iti agdama, ni Silvio Sabba ti akin-iggem ti rekord a 180 titles no sadino ket addaan met ti 173 titles ni Rush.
