LAOAG CITY – Maysa a lalaki a nagpammarang kas babai ti naarestar iti Faridkot, Punjab kalpasan a naduktalan a mangal-ala ti eksaminasion para iti sabali a tao.
Naammoan a tapno kasla aglanglanga a babai, nangikabil ti bindi iti muging ken napuskol a lipstick ni Angrez Singh.
Daytoy ket tapno mangala ti Multi-purpose Health Workers Exam para iti maysa a babai nga agnagan ti Paramjit Kaur.
Nupay kasta, natiliw iti panagpammarang ni Singh gapu iti biometric device ti Baba Faird University of Health Sciences ken napaspas a na-detect a peke dagiti ID daytoy.
Segun iti Vice Chancellor ti unibersidad a ni Dr. Rajeev Sud, insigida a timmawag ti pulis dagiti exam proctor tapno arestaren ni Singh. Dagusda met a ni-reject ti application ni Kaur ken mabalin nga ipa-blacklist ti nagan dagitoy ken saanen a mapalubosan pay a mangala ti health worker’s exam.
Awan ti ideya dagiti pulis no kaan-ano ni Singh ni Kaur ngem adda ti atapen ni Dr. Sud a posible a kameng ti maysa a sindikato ni Singh nga agpabpabayad tapno makaala ti exam.
