LAOAG CITY – Maysa nga agtawen ti 43 a lalaki idiay Japan a nabirngasan kas “Uncle Praise,” ti nangirugi ti naidumduma a pagbiagan ti mangipaay ti panangdayaw kadagiti tattao iti kalsada kasukat ti bassit a gatad.
Dati nga office worker iti Tochigi, dimmalan ni Uncle Praise iti nadagsen a pannubok kalpasan a nasursurona ti agsugal. Gapu iti daytoy, napukawan isuna ti trabaho, saan a nakabayad ti utang ken naburak ti pamiliana.
Gapu iti daytoy, naan-anayna nga inbati panagsugal ken rugian ti panagbalbaliw ti panagbiagna.
Arapaapna ti agbalin nga street performer ngem awan ti naidumduma a talentona kas ti magic wenno panagkanta isu a napanunotanna ti panangdayaw kas maysa a wagas iti panangbirok ti pagbiagan.
