LAOAG CITY – Maysa a food vlogger idiay Nigeria ti nakagun-od ti baro a world record kalpasan ti panagbisitana ken pannanganna kadagiti 150 a fast food restaurants iti uneg laeng ti 24 nga oras.
Kinumpirmaran ti Guinness World Records a ni Munachimso Brian Nwana ti baro a world record holder ti titulo a “Most Fastfood Restaurants Visited in 24 Hours” kalpasan a nabisita ken nakapangan kadagiti 150 a fast food iti lugarda idiay Abuja, Nigeria.
Iti pagannurutan ti Guinness, iti tunggal fast food a bisitaen ket masapol a mangan ti at least maysa a food item manipud iti menu daytoy.
Malaksid iti daytoy, public transport laeng ti mabalin a pagluganan ken maipawil ti agusar ti private vehicle.
Rinugian ni Nwana ti record breaking attempt-na ti 5:00 p.m. ken gapu ta saan a nalaka ti public transportation iti Abuja, pinagpagnana laeng dagiti amin a fastfood a binisitana.
Basar kadagiti saksi ken nangidokumento ti world record attempt ni Nwana, dumanon iti 25 a kilometro ti pinagpagnana.
Kuna ni Nwana, kas maysa a food enthusiast ken vlogger, inaramidna daytoy tapno itandudo ti Nigerian cuisine iti intero a lubong.
