LAOAG CITY – Nakaireord ti baro a Guinness World Record ti maysa a lalaki idiay Kentucky, USA kalpasan ti panangasemble-na ti ay-ayam a Mr. Potato Head bayat a naka-blindfold daytoy iti uneg laeng ti 7.92 a segundo.
Ti Mr. Potato Head ket maysa a sikat nga ay-ayam nga immuna a naipakaammo iti publiko idi 1950s.
Nabigbig ni Conor Shea kas baro a record holder para iti kaalistuan a panangbuo ti Mr. Potato Head a saan nga agus-usar ti mata no sadinno ket masapolna a pagsisilpuen ti nagduduma a paset ti nasao a Potato Head.
Mainaig iti daytoy, nabuong ni Shea ti dati a rekord ti German serial record-breaker a ni Andre Ortolf nga immunan a nakairekord ti 12.11 a segundo.
Kabayatanna malaksid iti panangbuong ni Shea iti baro a record, inaramatna ti record attempt-na tapno makaited ti atension iti Usher Syndrome, maysa a genetic disorder a mabalin a mangitunda ti panagawan ti panagdengngeg ken ininot a panagbulsek.
Inbatad ni Shea a kalikagumna nga ipakita iti publiko a bayat ti kinaadda ti kodision iti bagi ti maysa nga indibidual ket posible latta a maragpat ti aniaman a kalikagum iti panagbiag.
Para ken ni Shea, ti 7.92 a segundo ket saan laeng a maipanggep iti kinaalisto no diketdi nagbalin daytoy a mensahe ti determinasion ken pag-asa para kadagiti indibidual a sumangsango iti Usher Syndrome.
