LAOAG CITY – Sumango ti kaso a panaglabsing iti Republic Act (RA) 9165 wenno Comprehensive Dangerous Drugs Act of 2002 ni Gilbert Tagata y Balino, agtawen iti 37, addaan ti live-in partner, taga Brgy Valdez, Banna, Ilocos Norte ngem agdama nga agnanaed iti Sitio Nagcalaoan, Brgy 17, Tabug iti ciudad ti Batac.
Daytoy ket kalpasan a natiliw iti drug buy-bust operation iti barangay road bisinidad iti Sitio Nagcalaoan, Brgy 17, Tabug ti nasao a ciudad.
Natiliw ni Tagata kalpasan a naglako iti maysa a sachet a naglaon ti maipagarop a shabu iti maysa a nagpammarang a police poseur buyer nga agbalor ti 500 a pisos.
Iti panangkapkap dagiti otoridad ti nasao a suspek ket nakakumpiskar da iti 2 a sachet a naglaon ti maatap a shabu ken ti kwarta na nga 1,061 a pisos.
Mainaig iti daytoy. kinumpirmaran ni Police Chief Inspector Rodelio Santos, ti baro a chief of police iti Batac City a nabayagen a sipsiputan ti nailian a pulisya ni Gilbert Tagata gapu iti illegal nga aktibidad na.
Inlawlawag na a ni Tagata ket adda iti drug watchlist iti PNP-Banna ngem agnanaed daytoy iti Sitio Nagcalaoan, Brgy 17, Tabug iti ciudad ti Batac.
Inbatad na a ni Tagata ket cook iti maysa a panganan iti ciudad ti Batac.
Innayon ni Santos a ni Tagata ket adda iti Street Level Target (SLT) ti PNP.
Mainaig ti daytoy, kinumpirmaran na nga ado pay dagiti mamonmonitor da iti ciudad ti Batac nga invloved iti illegal a droga.
