LAOAG CITY – Natay ti maysa a lalaki kalpasan a napalto-paltugan iti paset ti Nueva Era – Banna road bisinidad iti Sitio Mabarbaric, Brgy. Binacag iti ili ti Banna.
Nabigbig ti biktima a ni Michael Arnejo y Castillo, agtawen ti 41, agpapautang, naasawaan ken residente iti Brgy. Macayepyep, Banna.
Segun ken ni PLt. Col. Mar Luis Bondoc iti Provincial Investigative Detective and Management Office ti INPPO, naglugan ti motorsiklo nga Hondo Wave ti biktima.
Kuna a basar iti panagimbestigar da ket agpapalaud a direksyon idi ta kellaat a pinaltu-paltogan dagiti saan pay a nabigbig a suspek.
Inbatad na a nagsagaba ti tama ti bala ti paltog iti kili-kili ken pispis ti biktima.
Kuna ni Bondoc a narekobre iti nakapasamakan ti krimen ti dua nge empty shell ken maysa a bala ti calibre 45 a paltog.
Kabayatanna, inpakaammo ni Bondoc a nagpukaw ti tulbek ti motorsiklo ti biktima pakairamanan ti cellphone daytoy.
Nu pay kasta, inbatad na nga agtultuloy ti imbestigasyon ken ti pannakaduktal ti posible a motibo iti nasao nga insidente kasta pay ti pannakabirok dagiti nakalibas a suspek.
