LAOAG CITY – Balligi a naarestar ti maysa a lalaki iti naiyuswat nga drug buy bust operation iti Brgy. Ablan iti ili ti Burgos.
Nabigbig ti suspek a ni Melflro Baclig y Vicente alyas Empol, agtawen ti 43, naasawaan, self-employed, tubo iti Brgy Pug-os, Cabugao ngem agdama nga agnanaed iti Brgy. Ablan, Burgos.
Basar iti report ti PNP, naglako ti maysa nga heat sealed transparent plastic sachet a naglaon ti maipagarup a shabu ti suspek iti nagpammarang a police poseur-buyer iti balor a 1,000 a pisos.
Nakumpiskar manipod iti suspek dagiti naaramat iti transaksyon pakairaman maysa a blue pouch a naglaon ti 12 nga heat-sealed transparent plastic sachets a naglaon met laeng iti maatap a shabu.
Umabot iti 2 a gramo ti kadagsen dagiti nakumpiskar ken agbalor amin iti 13,600 a pisos.
Kabayatanna, naamoan a ti suspek ket high value individual ken adda iti Top 10 Regional Priority List.
Manamnama a mapilaan ti kaso a panaglabsing iti Sec 5 ken Sec 11 ti RA 9165 wenno Comprehensive Dangerous Drugs Act of 2002 ti suspek.
