LAOAG CITY – Natiliw ti maysa a nabartek a lalaki gapu ti panangdangran na ti maysa a barangay tanod iti Brgy. Ver iti ili ti Dingras.
Nabigbig ti suspek a ni Melvin Joy Apostol y Agcanas, agtawen ti 25, baro ken residente iti Brgy. Ver iti ili ti Dingras ken ti biktima ket ni Barangay Tanod Michael Domingo y Ganotisi, agtawen ti 45, naasawaan ken residente iti nasao a barangay.
Basar iti report manipud ti PNP Dingras, Abril 10 iti agarup 7:45 ti rabii, nagprobokar ken nagkarkarit ni Apostol bayat nga adda iti impluwensya ti nasanger rason a nagresponde dagiti opisyal ti barangay tapno anawaen da daytoy.
Nupay kasta, nagresistir ni Apostol kadagiti opisyal ti barangay ken dinanog na ti sumagmamano a daras ti rupa ni Domingo.
Dagus met a naitaray ti biktima iti Dingras District Hospital idinto a natiliw ni Apostol babaen dagiti nagresponde a pannakabagi ti linteg.
Maisagsaganan ti maipila a reklamo wenno direct assualt kontra kenni Domingo.
