LAOAG CITY – Nalamiisen a bangkay idi nabirokan dagiti otoridad ti maysa a lalaki iti fishpond iti Brgy. Elizabeth iti ili ti Marcos.
Binigbig ni PLt. Rudy James Jacalne, ti hepe ti PNP-Marcos ti biktima a ni Rogelio Pascua idinto a ti suspek ket ni Jaime Domingo, kayong ti biktima.
Kuna ni Jacalne nga immuna a nakaawat da ti report mainaig iti maipagarup a nalmes iti fish pond wenno piskarya iti Brgy. Elizabeth.
Inbatad na a dagus a nagresponde ti kapulisan ket dita a narekobre ti bangkay ti biktima manipod iti fish pond.
Mainaig iti daytoy, inlawlawag na a kabayatan ti imbestigasyon ket adda ti nakita a dara iti kubo iti asideg ti fidh pond.
Kuna ni Jacalne a naamoanda a naggi-inom ti biktima ken ti suspek idi rabii ti domingo ken maipagarup a dita nga adda ti nagbalin a riri dagitoy maipanggep iti fish pond.
Inbunannag na a bayat ti panagriri dagiti dua ket dita nga immasot ti buneng ti suspek ken inbagkong na iti mismo a barakong ti biktima ken isu met ti dagus a nakatayan daytoy.
Inbatad ni Jacalne a kalpasan a nabagkong ti biktima ket intapwak ti suspek iti fish pond.
Inpakaammo ti hepe a gapu ti pannakaiyuswat ti naiget nga hot pursuit operation ken babaen ti tulong dagiti residente ket nakemmeg ti suspek.
Kuna na a nagtalinaed ti suspek iti kuerpo ti pulisya bayat a maisagsagana ni kaso a murder a maipila kontra kenkuana idinto nga agtultuloy ti naun-uneg ngai imbetigasyon iti nasao nga insidente.
