LAOAG CITY – Inistorya ni Mr. Gil Pagtacunan, residente iti ili ti Paoay no kasano a nagutigot a gumatang kadagiti nagduduma nga appliances nga agbalor ti 74 a ribo a pisos.
Segun kenni Pagtacunan, bayat a magmagna iti Rizal St. ket limmabas iti pagtagilakoan ti appliances ken dagiti empleado ket adda iti ruwar ti pasdek ken indiaya da kenkuana ti libre a kapote.
Kunana a pinastrek da iti isuna ken inpatugaw da iti massage chair ken maipagarop a saan na a napuutan ti bagbagi na nga immanugot kadagiti amin nga ibagbaga dagiti empleado.
Inlawlawag na a ti ummuna ket pinagbunot da isuna ti ticket ket adda ti dua ribo a pisos ken ado pay dagiti inbagbaga dagiti tallo nga empleado ken ti maysa a supervisor ti pasdek.
Kalpasan daytoy, kunana a dagus da nga indeliver iti pagtaengan da dagiti appliances a ginatang da.
Naamoan nga adda ti inbayad ni Pagtacunan a 30 a ribo a pisos bayat nga adda iti pasdek ken ti kurang ket binayadan na idi simmangpet da iti balay da.
Nupay kasta, kunana nga idi naamoan ti asawa na ket nakapungtot daytoy gapo ta para iti edukasyon dagiti annak da ti kwarta.
Karaman kadagiti appliances ket ti massage chair, electric stove, foot massage ken dadduma pay.
Gapo iti daytoy, kalikagom ni Pagtacunan nga isubli na dagiti appliances tapno maala na ti kwarta na.
Kabayatanna, iti panagturong ti Bombo Radyo iti nasao a pasdek tapno maalaan ti komento ket nagkedked dagitoy nga agsarita ken ti laeng kasarita ken katransaksyon da ket dagiti customers.
