LAOAG CITY – Desidido a mangipila ti reklamo ni Mr. Lodivico Bacud iti Brgy. Masintoc iti ili ti Paoay kontra ken ni Police Corporal Galapia, maysa a kameng ti Provincial Mobile Force Company kalpasan ti maipagarup a panangdangran na iti datoy.
Inlawlawag ni Bacud a nagkakadwa da ken ni Galapia iti minatayanken naggi-inom dagitoy.
Nu pay kasta, kuna na nga idi agawid daytoy ket sinaruno ti pulis ken dita a kellaat a dinanog na iti namindua a daras.
Gapu iti daytoy, nagsagaba bimtak ti muging na ken nasugatan pay iti babaen ti mata na.
Inbatad ni Bacud nga awan ti ammo na a riri iti nagbaetanda ken ni Galapia gapu ta agkabaygan pay dagitoy.
Immuna iti daytoy, kuna ni Bacud a basar iti palawag ti pulis kenkuana ket maipagarup a nagsipnget ti panagkita na isut gapu na a nadanog na daytoy.
Kabayatanna, inbatad ni Pol. Staff Sgt. Lawrence Tabbal, ti imbestigador iti PNP-Paoay a nagturong iti kuerpo da ni Police Corporal Galapia tapno ipalawag ti napasamak iti nagbaetanda ken ni Mr. Lodivico Bacud.
Kuna ni Tabbal a basar iti palawag ni Galapia ket napan iti minatayan ken nadanun na da Bacud ken dadduma pay a kabagyan na.
Inbatad na a naawis nga agpaala rason a nagpaala ti nasanger nga isu ti nagsasangoanda
Nu pay kasta, bayat ti panagsasango dagitoy ket rimuar ti karruba ti natayan a ni dati a Brgy. Chairman Leonard Agdeppa ken maipagarup a kellaat nga insawang na a nu pay pulis ni Galapia ket saan nga agbalin.
Gapu iti daytoy, kuna ni Pol. SSgt. Tabbal a sinungbatan ni Galapia daytoy ken kiniddaw na a saan a mairamraman iti aniaman a riri.
Kabayatanna, rumrumuar a sakbay a nagawid ni Bacud ket binagkat na ti tugaw ken inlayat na iti kasinsin ni Galapia rason a naganawa ti pulis.
Nu pay kasta, maipagarup a saan a nagpanaawa ni Bacud ken iti pannakaanawa na ket naitakleb rason a nasugatan ti muging ken iti babaen ti mata na.
Mainaig iti daytoy, inbatad ni Pol. SSgt. Tabbal a nu mapaneknekan kadagiti dokumento ni Bacud nga agbayag ti 30 nga aldaw ti panagimbag dagiti sugat na ket posible a mapilaan ti serious physical injury ni PCpl. Galapia.
Immunan nga inpakammo t imbestigador a ni Bacud ket pagtaltalkan ti dati a kapitan iti panagbantay ti pagtaraknan ti lames wenno ti sabangan.
