LAOAG CITY – Balligi a naarestar dagiti kameng ti PNP-Piddig, Provincial Intelligence Unit ken ti Provincial Drug Enforcement Unit (PDEU) ti Ilocos Norte Police Provincial Office (INNPO) ti maysa a wanted person.
Daytoy ket agtawen ti 33 a lalaki ken residente iti Brgy. Tangaoan iti nasao nga ili.
Segun ken ni PLt. Donaldson Palaganan, ti hepe ti PNP-Piddig, naarestar ti akusado babaen ti bileg ti warrant of arrest nga inyetnag ti Hon. Sheela Nalupta, ti presiding judge ti Branch 65 ditoy siudad ti Laoag.
Kuna na a sumangsango daytoy ti kaso a panagsalungasing ti RA 10591 wenno ti iligal a panagikot ti armas.
Nagatalinaed ti akusado iti kustodyar ti PNP-Piddig ken nairekomendar ti 120,000 a pisos a piyansa para iti temporaryo a pannakawaya-waya na.
Naamoan a natiliw ti akusado idi Setiembre 15, 2019 bayat nga agpatpatrolya dagiti kameng ti PNP ket nasalamaan da daytoy nga addaan ti ikot a caliber 9mm pistol ken lima a bala.
