LAOAG CITY – Balligi a naarestar ti maysa a lalaki a subject ti drug buybust operation nga insayangkat dagiti kameng ti PDEU ken PDEA pakairamanan ti PNP-Piddig iti Brgy. 2 iti ili Piddig.
Nabigbig ti subject ti operasyon a ni Marcos Sy y Campos, agtawen ti 39 ken residente iti nasao a barangay.
Segun ken ni PLt. Jackson Sugayen, ti mangidadaulo ti PDEU-INPPO a maysa a pulis a nagpammarang a poseur buyer ti kinatrasaksyun ti suspek.
Nakumpiskar manipod ken ni Campos ti maysa a sachet ti maatap a shabu ken boodle money a sangaribo a pisos a nasuar iti transakyun.
Daytoy ket pakairamanan pay uppat a sachet ti maatap a shabu a naalaa iti bulsa na, 4,000 a pisos, ligher, cellphone ken maysa a calibre 22 a paltog nga addaan ti tallo a bala.
Mainaig iti daytoy, kuna ni PLt. Sugayen a ti suspek ket adda iti drugs watchlist ti regional level gapu ta maysa daytoy kadagiti receiver ti maideliver nga iligal a droga iti ili ti Pinili.
Innayun na a miembro pay daytoy ti saan nan nga innaganan a drug group ken datin a naibalod gapu metlaeng iti iligal a droga ngem nawaya-wayaan idi 2016.
Kabayatanna, naiget a ninigar ti suspek ti alegasyon kontra kenkuana.
Inlawlawagna a bayat ti ka-adda na iti likod ti pagtaenganda tapno agpaangin ket kinasarita ti maysa nga otoridad a nangibaga mangkita kadagiti kalding a nakwarwar iti likud ti balay da.
Kuna na a pinastrek na daytoy ngem adda ti nangsaruno a dua nga indibidual ken dita a kellat a panangpapakleb ken nakapkap ti bulsa na.
Inpetteng na a ti laeng sigarilyo ken cellphone ti adda kadagiti bulsa ti sapin na ken saan a ti iligal a droga ken paltog.
Innayun na a nakasagana a dumalan iti drug test tapno mapaneknekan nga awan ti iligal nga aktibidad na.
Nu pay kasta, nagtalinaed iti PNP-Piddig ti suspek bayat a maisagsagana ni maiyannatop a kaso kontra kenkuana.
