LAOAG CITY – Maam-amak ni Mr. Joven Adtang iti Barangay Isic-Isic Vintar kalpasan ti pannakatay ti ina na nga ummuna a naideklara a negatibo iti antigen test ngem positibo iti RT-PCR test.
Ummuna iti daytoy, kuna ni Adtang nga idi Agosto 14, intaray da iti pribado nga ospital ti ina na ken dagus a dimmalan iti antigen test no sadinno ket negatibo ti resulta na.
Segun kenkuana, iti Agosto 15 ket pimmusay ti ina na ket ti adda iti death certificate daytoy ka rason ti nakatayan na ket ti spontaneous bacterial peritonitis, hepatorenal syndrome ken liver cirrhosis.
Inlawlawag na nga iti dayta met laeng nga aldaw ken idi natayen ti ina na ket naipadalan latta iti swab test ngem awan ti bilin ti ospital a maihold ti bangkay no diket pinalubusan da a rumuar daytoy gapo ta negatibo met iti antigen test.
Nupay kasta, idi Agosto 17 ket rimuar a positibo iti covid-19 ti ina na nga isu ti pagam-amkan iti agdama ni Mr. Adtang amangan no naimpektaran met isuna iti virus.
Malaksid iti daytoy, maam-amak pay a no bilang naakaran isuna ti covid-19 ket ado dagiti napanan na para iti pannakaiproseso ti dokumento iti pannakatay ti ina na kalpasan a nairwar iti ospital.
Karaman pay kadagiti nakapulapol ti ina na ket dagiti kabagyan da iti ili ti San Nicolas idinto a nagturong pay iti munisipyo ken RHU iti nasao met laeng nga ili, kasta pay ti punerarya iti ili ti Sarrat a nangasikaso iti bangkay.
Mainaig iti daytoy, kunana nga idi naamoan da a dagus a positibo ti swab test ti ina na ket dagus da met nga inpa-cremate daytoy ken naipakammo nan iti ospital ken RHU-Vintar.
Kabayatanna, immapela met a no mabalin ket al-alisto kuma ti pannakaiparuk-at ti resulta ti swab test ti kakastoy ti sitwasyon na.
