LAOAG CITY – Natay ti maysa a lalaki a maibilang a mentally challenge kalpasan a nadungpar ti maysa a delivery truck iti paset ti Barangay Billoca iti ciudad ti Batac.
Daytoy ti kinumpirmaran ni PO1 King Sabado, imbestigador iti PNP-Batac City.
Binigbig ni Sabado ti biktima a ni Ivan Ruiz, agtawen 51, taga Brgy. San Simeon, Currimao, Ilocos Norte.
Segun ken ni Sabado, naitaray ni Ruiz iti Mariano Marcos Memorial Hospital and Medical Center ngem indeklara ti attending physician a ni Dr. Robert Cabundong a dead on arrival.
Inlawlawag na nga iti imbestigasyon da, bayat ti idadalyasat ti biktima a nakalugan ti bisikleta iti Along Manila North Road bisinidad ti Brgy. Billoca ti nasao a ciudad ket isu metten ti pannakadungpar ti truck nga inturong ni Ramil Ducusin, taga San Fernando, LA Union.
Iti agdama, nagtalinaed ni Ducusin iti kustodyar ti PNP iti ciudad ti Batac.
