LAOAG CITY – Maysa a saan a ninamnama nga insidente iti maysa a baybay idiay Lake Michigan idiay Estados Unidos ti nagtennag iti saan laeng iti pannakaisalakan ti maysa a lalaki manipud iti kumunoy no di ket iti maysa a baro a relasion.
Naammoan a kabayatan a magmagna ken agbirbiruk ti Leland blue stones iti Reynolds Street Beach idiay Leland, Michigan ket kellaat a limned agingga iti siket ni Mitchell O’Brien kalpasan a nagna iti paset ti nabasa a kurruoy a naduktalan a maysa daytoy a kumunoy. Kaduana idi ni Breanne Sika a katrabahoanna iti trabaho.
Saan a daytoy ti umuna a daras a napasaranna iti kastoy a klase ti peggad iti Great Lakes.
Nagsina a timmawag iti 911 da O’Brien ken Sika ket ditoy a nabukel ti opisial a panangduktalda iti tunggal maysa kas agkarelasion.
Insigida a nakasangpet dagiti emergency responders ken natalgedda a naiahon ni O’Brien manipud iti kumunoy.
Basar iti imbestigasion, ti “quicksand” wenno kumunoy ket resulta ti hydraulic dredging iti lugar no sadinno nga ik-ikkatenda ti agarup 60,000 cubic yards ti kurruoy manipud iti uneg ti harbor.
Nagballaag dagiti otoridad, narisgo ti slurry a mabatbati manipud iti dredging gapu ta mabalin daytoy a mangitunda ti panagreggaay wenno pannakalibeg.
Nangipaskilen ti Leland Township Fire Department kadagiti pakdaar iti lugar tapno maliklikan ti kapada nga insidente.
