LAOAG CITY – Naarestar ti maysa a lalaki gapu iti carnapping iti ili ti Pinili.
Nabigbig ti suspek a ni Dominic Soliven, agtawen 26 ken residente ti Brgy. Pangpangdan, Sto. Domingo, Ilocos Sur.
Segun ken ni Police Captain Kester Arellano, ti Hepe iti Philippine National Police iti nasao nga ili, agarup alas onse idi rabii ket naiendorsar ti suspek babaen met laeng kadagiti residente iti nadakamat a lugar kalpasan a naaktuaranda nga agtakaw wenno agitaray ti motorsiklo.
Inbatadna a dagiti nangiyendorsar iti suspek iti kuerpo ti pulisia ket maysa a construction worker nga agtawen ti 33 ken maysa nga heavy operator nga agtawen ti 45 nga agpada dagitoy a residente ti Brgy. Badio iti ili ti Pinili.
Inlawlawagna a basar iti insayangkatda nga imbestigasion ket naduktalan a ti motorsiklo a nagandat a maitaray ket Yamaha Mio Soul nga agmaris ti gray nga addaan ti plate number 973 AMI.
Kunana a ti nasao a motorsiklo ket naka-parking iti sangoanan ti Don Mariano Marcos Memorial School idi napasamak ti insidente.
Mainaig iti daytoy, inpalgakna a kinemmeg dagiti maseknan a residente ti suspek nga inyendorsarda iti Philippine National Police personnel nga adda iti Protect Box.
Innayonna a manamnama a ma-inquest ita nga aldaw ti kaso gapu iti motornapping kontra iti suspek.
Kabayatanna, naammoan a basar iti pannakikoordinarda iti Ilocos Sur Police Provincial Office ket naduktalan nga addan ti rekord daytoy iti kallabes gapu iti panagtatakaw.
