LAOAG CITY – Inadmitir ni Mr. Jayson Tungpalan, agtawen ti 30 ken residente iti Barangay Madiladig ditoy ciudad ti Laoag a kinugtaran na ti namindua a daras ti ima ti asawa na gapu iti nakaro a pungtot na.
Inlawlawag na iti Bombo Radyo Laoag a dumawat ti 100 a pisos ti baket na ngem awan ti naited na gapu ta saan pay a nagsweldo.
Gapu iti daytoy, maipagarop a nakapungtot ti asawa na ket inbakal-bakal na dagiti sumagmamano nga alikamen da iti kusina.
Inpetteng ni Tungpalan nga ub-ubbaen na ti anak da nga agtawen ti maysa idi agibakal-bakal ti asawa na kadagiti alikamen da isut gapuna a saan nan a nalapdan ti rikna na ket nakugtaran na ti namindua a daras ti ima ti babai.
Inpasingked na a saanna nga ugali ti mangdangran iti asawa na ngem nakapungtot isut gapuna a naaramid na ti nangkugtar kenkuana.
Kinumpirmaran met ni Tungpalan nga adda bassit ti inom na idi napasamak ti insidente.
Agpapan ita ket maiyur-uray pay laeng ti desisyon ti asawa ni Tungpalan no ipursige na ti mangipila ti reklamo kontra kenkuana.
Nagtalinaed ni Tungpalan iti kustodyar ti PNP ditoy ciudad ti Laoag.
