LAOAG CITY – Natiliw ti maysa a lalaki iti naisayangkat a drug-buy bust operation iti Barangay Mandaluque iti ili ti Dingras.
Binigbig ni Barangay Chairman Richard Marquez ti subject ti operasyon a ni Mr. Kaempher John Bugas y Tapaoan, agtawen ti 35, naasawaan, drug surrenderer ken residente iti nasao a barangay.
Nakumpiskar dagiti otoridad iti ikot ti suspek ti maysa nga elongated heat sealed plastic sachet a naglaon ti maipagarop a shabu, maysa a bassit a sachet a maipagarop a naglaon ti shabu, sangaribo a nausar iti operasyon, cellphone ken ti motorsiklo ni Bugas.
Segun ken ni Marquez, idi adda ti natiliw a kabarangayan da ket napan kenkuana ni Bagus ken naibaga na kenkuana nga adda ti panagamak na amangan no sabali ti ibagbaga ti maseknan kadagiti otoridad kangrunaan na ket adda ti saanda a nagkinnaawatan.
Insungbat met ti kapitan a saan pay laeng a rumrumuar ni Bagus ken no awan ti aramid na ket awan ti rumbeng a pagdanagan na.
Kabayatanna, inpasingked ni Bagus a saanna a kukua dagiti naala nga ebidensya kontra kenkuana ken naminpinsanen a nagbalbaliw manipod iti madi nga aramid na.
