LAOAG CITY – Naarestar ti maysa a lalaki iti Search Operation kalpasan a naalaan ti paltog ken balbala iti Barangay 15, San Roque I iti ili ti Bacarra.
Daytoy ket babaen iti bileg ti Search Warrant gapu iti panaglabsing ti suspek iti Republic Act No. 10591 wenno ti Comprehensive Law on Firearms and Ammunition Regulation Act a napetsaan idi Marso 17 nga inparuk-at ni Hon. Dinah Myrtle Pacquing, Executive Judge ti Regional Trial Court, First Judicial Region, Branch 11, Laoag City.
Natiliw ti suspek iti pagtaengan ti live-in partner daytoy iti nasao met laeng a barangay.
Nakumpiskar dagiti otoridad ti maysa a caliber .45 nga addaan ti magazine nga adda ti kargana a pito a bala ken maysa a black inside holster.
Nagusar ti kapulisan ti dua nga Alternative Recording Device kabayatan ti pannakaiwayat ti Search Operation nga inmatangan dagiti barangay officials ti Barangay 15, San Roque I iti ili ti Bacarra.
