LAOAG CITY – Naarestar ti maysa a lalaki kalpasan a naalaan ti maipagarup a shabu kabayatan iti pannakaiwayat ti checkpoint iti Barangay 9, San Pedro iti ili ti Paoay.
Nabigbig ti suspek a ni Mike Lorence Rosal, agtawen ti 30, awanan asawa ken residente ti Barangay 31, Sideg iti nasao met laeng nga ili.
Segun ken ni P/Capt. Jackson Sugayen, Hepe ti Paoay Municipal Police Station, kabayatan a maiwaywayat ti checkpoint iti national highway ti Barangay 9, San Pedro iti ili ti Paoay ket nagsardeng ti suspek ken nakiddaw kenkuana iti panangipakitana ti driver’s license ken OR/CR ti motorsiklona.
Nupay kasta, kunana nga apaman a linukatan ti suspek ti compartment ti motorsiklona ket ditoy a nakita dagiti otoridad ti tallo a pedaso ti heat sealed plastic sachet tape a naglaon ti maipagarup a shabu a natnag iti kalsada manipud iti driver’s license case daytoy.
Malaksid iti daytoy, inlawlawagna a nakumpiskar ti dua a pedaso ti heat sealed transparent plastic sachet a naglaon ti maatap a shabu manipud iti compartment ti motorsiklo ti suspek ken dua pay a pedaso ti heat sealed transparent plastic sachet a naglaon ti mapapati a shabu manipud met iti akinkannigid a bulsa ti jacket ti suspek pakairamanan dagiti dadduma pay a drug paraphernalia.
Gapu iti daytoy, insigida nga inarestar ti kapulisan ti nasao a suspek.
Mainaig iti daytoy, amin a naala nga iligal a droga ket agdagsen ti sumurok-kumurang uppat a gramo nga agbalor ti 27,200 a pisos.
Kabayatanna, sumango ti suspek iti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
