LAOAG CITY – Inlawlawag ni Police Lt. Col. Amador Quiocho, hepe ti PNP Laoag ti napasamak panagdangran ken panagpaputok ti paltog iti maysa a construction iti Brgy. 48-B Cabungaan ditoy siudad ti Laoag.
Kuna na a mangan kuma iti pangrabii ti biktima idi ta immasideg ti maysa a suspek ken minalo na ti dos-por-dos.
Inbatad ni Quiocho nga idi naanawa ti immuna a suspek ket dimteng met ti ama na a suspek ket pinaltogan na ti motorsiklo ti biktima.
Dagus met a naitaray ti biktima iti ospital gapu ti pannakamalo na ken nasayaaten ti kondisyon na.
Innayon ni Quiocho a dagus nagtalimpuagaw dagiti agama a suspek kalpasan ti insidente ken intugot da ti paltog na nausar.
