LAOAG CITY – Maysa nga agtawen iti 59 a German ti dua a bulanen nga agnanaed iti uneg ti baybay tapno magun-od ti Guinness World Record title a “Longest Time Spent Living in an Underwater Fixed Habitat.”
Ni Rudiger Koch ket sumurok 60 nga aldawen nga agnanaed iti underwater capsule a masarakan iti kabaybayan ti Puerto Lindo, Panama iti Caribbean Sea.
Iti sumurok dua a bulan a panagnaedna, ditoyna metten nga ar-aramiden ti amin a trabahona kas maysa nga aerospace engineer.
Ti pagtaenganna ket adda ti kadakkelna a 322 square feet. Adda dagiti pasilidad daytoy kas ti portable toilet, TV, computer, kama, stationary bike, solar power, satellite Internet ken dagiti bentilador.
Rinugian ni Koch ti world record attempt idi Setiembre 26 ken planona a tumakdang manipud iti uneg ti baybay inton Enero 24 kalpasan ti 120 nga aldaw a panagtalinaedna.
Ti agdama a rekord a masapol nga artapan ni Koch ket 100 nga aldaw a nagun-od ni Joseph Dituri idi 2023 idiay Florida.
