LAOAG CITY – Naipisuken iti Ilocos Norte Provincial Jail ti agnagan ti Jesus Bagay, agatwen ti 64 ken residente ti Barangay 2 iti ili ti San Nicolas.
Daytoy ket kalpasan a naipilaan ti kaso nga Estafa ken panagsalungasing ti RA 9165 gapo iti panagikot na ti iligal a droga.
Segun kenni PO3 Jerome Ruiz, negatibo ti resulta ti eksaminasyon ti nagatang a droga wenno peke a droga isut gapo na nga estafa ti naipila a kaso idinto a dagiti naala iti ikot ni Bagay ket maysa ti nagpositibo.
Maipalagip a tallo a sachet a ngalaon ti maipagarop a shabu ti narekobre dagiti otoridad bayat ti naiyuswat nga operasyon.
Kabayatanna, kinumpirmaran ni Police Chief Inspector Paul Benedict Parado, chief of police ti PNP-San Nicolas a peke a droga ti inlako ni Jesus Bagay.
Inbatad ni Parado nga adda latta dagiti maibagbaga nga ampaw a droga.
Innayon na a saan a daytoy ti ummuna a gundaway a naka-encounter ti kastoy a pasamak.
