LAOAG CITY – Nakuryente ti maysa a lalaki iti tuktok ti covered pathwalk ti Northwestern University ditoy ciudad ti Laoag.
Nabigbig daytoy a ni Alwin Llanera y Martinez, agtawen ti 34, awanan asawa, Fabricator ken residente ti Dama de Noche St., Villa Adelina Subdivision, Brgy. Polo, Cabuyao, Laguna.
Segun kenni Mr. Karl Lenin Benigno, ti Chairman ti Disaster Response Team, maysa ti biktima kadagiti tallo a kinontrata ti nadakamat a unibersidad tapno aginstolar kadagiti markers a naaramid manipod iti marbles iti Ben A. Nicolas Building.
Naamoan a nasagid ti biktima iti live wire a nakonektar iti poste ti INEC a nangitunda ti pannakakuryentena.
Inbatad ni Benigno a saan a dimmawat iti permiso dagiti biktima kadagiti security guard wenno dagiti opisyal ti nadakamat nga unibersidad a mapan iti nasao a lugar.
Nupay kasta, addan iti natalged a kasasaad ti biktima a maag-agasan iti Mariano Marcos Memorial Hospital and Medical Center iti ciudad ti Batac.
Iti agdama, agtultuloy iti imbestigasyon dagiti otoridad mainaig iti daytoy a pasamak.
