LAOAG CITY – Manamnama ti pannakaipila ti kaso kontra ti maysa a lalaki gapu ti panagikot na ti paltog idiay Barangay Bato, Badoc, Ilocos Norte.
Nabigbig daytoy a ni Richard Arizabal y Ibarra, agtawen iti 37, naasawaan, mannalon ken residente ti Brgy. Paltit iti ili a Badoc.
Immuna ti daytoy, nagresponde dagiti kameng ti PNP-Badoc iti Barangay Bato iti nasao nga ili kalpasan a naireport nga adda ti mapaspasamak a komosyon ti lugar.
Apaman a nakadanun dagiti pulis a nagresponde ket nakita da ti grupo dagiti lallaki nga aggiinum ken sakbay a naka-asideg da iti ayan dagiti maseknan ket immadayo ni Arizabal ken nakita da nga inbakal na ti paltog na a maysa a caliber 38 special Taurus Brazil nga addaan ti serial number nga HA 10115 nga addaan ti 3 a bala.
Gapu ti daytoy, tiniliw dagiti pulis ni Arizabal ken manamnama a pilaan da ti maiyannatop a kaso.
