LAOAG CITY – Napaltogan ti maysa a lalaki babaen ti pada na met laeng a lalaki idiay Barangay 40, Balatong ditoy ciudad ti Laoag.
Nabigbig daytoy a ni Reniel Valdez Asesor, agtawen ti 29, awanan ti asawa tubo idiay Bagong Silang, Caloocan City ken agdama nga agnanaed idiay Barangay 40, Balatong idinto a ti suspek ket ni Ronald Busto, adda iti umno a tawen ken residente iti Barangay 2, Laoag City, agpada nga empleado ti Pascual Sales Farm.
Iti imbestigasyon, simmangpet ni Asesor iti farm nga adda ti impluwensya ti nasanger ken naaddaan da ti nabara a diskusyon kenni Busto.
Gapo iti daytoy, nangirwar ti biktima ti buneng ken ginandat na a tagbaten ti suspek ngem nakalisi ket ditoy met nga inruwar ni Busto ti airgun na ken pinaltogan na ti naminsaan a daras ni Asesor.
Natamaan ti barukong ti biktima ket dagus a naitaray iti Laoag City General Hospital ken dagus a naiyakar iti Mariano Marcos Memorial Hospital and Medical Center idiay ciudad ti Batac ken addan iti nasayaat a kondisyon.
Narekobre dagiti pulis ti maysa a buneng nga agatiddog ti 18 a pulgada, maysa nga airgun rifle ken ti maysa oxygen tank para iti paltog.
