LAOAG CITY – Awan pay ti suspek iti pannakapaltog ken ni Ralph Alejo, agtawen ti 33, awanan asawa, maysa a mannalon ken residente iti Brgy. Sagpatan iti ili ti Dingras.
Daytoy ti inbatad ni P/Supt. Relly Arnedo, Hepe ti Pulisya ti nasao nga ili.
Segun kenkuana, nupay adda dagiti naimbitaran tapno mapagsaludsudan ken naipadalan ti paraffine examination ket awan ti naibaga da no siasinno ti nakita da a nagpaltog ken ni Alejo.
Mainaig iti daytoy, nagpannawagan ni Arnedo kadagiti adda ammo na iti nasao a krimen iti pannakikoordinar da laeng iti opisinada ken impasigurado na nga ilemmengda ti katatao da.
Maipalagip nga agawiden ti balay da ti biktima manipud iti nakin-inuman na a pagtaengan ti agnagan iti Freddie Mariano iti nasao met la a barangay idi nakaturog iti kalsada nga idiay a pinaltugan da babaen iti saan pay a madeterminar a kalibre ti paltog a nakatamaan ti panga na ken nagbati ti buli iti asideg ti agong na.
Mag-agasan ita iti Mariano Marcos Memorial Hospital and Medical center iti ciudad ti Batac.
Innayon ni Arnedo a saan pay nga ammo no ania ti motibo ti nasao a pammaltog.
