LAOAG CITY – Natnag ti maysa a lalaki manipud iti likod ti nagluganan na a pick-up iti Brgy. Apatot-Lubong iti ili ti Pinili.
Segun ken ni PLt. Roi Manuel Ordonio, Hepe ti Philippine National Police iti ili ti Pinili, daytoy ket kalpasan a nagsinnapgod ti maysa nga SUV nga Innova ken Pick-up a Hilux.
Inbatadna a nabigbig ti driver ti SUV nga agtawen ti 32, awanan asawa, kameng ti Philippine National Police ken residente iti ili ti Solsona idinto a nabigbig met ti nangiturong ti pick-up nga agtawen ti 50, naasawaan, Civil Engineer ken residente iti ili ti San Nicolas.
Kunana a basar iti insayangkatda nga imbestigasion, bayat a dumaldalyasat ti driver ti pick-up nga agturong nga agpa-amianan ket adda ti linisianna ngem dita metten a nadungpar daytoy ti SUV nga agturong met iti kapada a direksion.
Inlawlawagna nga agpada nga agawidkoman dagiti maseknan a nakalugan ti SUV ken pick-up kadayta a gundaway ngem gapu iti saan a napakpakadaaan a desgrasia ket dita a nagsinnapgod dagiti dua a lugan a nangitunda ti pannakatnag ti maysa a lalaki a nakalugan iti likod ti pick-up.
Gapu iti daytoy, kuna ni PLt. Ordonio a dagus met a naitaray iti ospital ngem nakaruar met laeng daytoy kalpasan a nataming.
Inbagana a naggapu idiay Baguio City ti pulis gapu ta manarimaan ti schooling daytoy idinto a naggapu met iti maysa a proyekto iti ruar ti probinsia ti inhinyero sakbay a napasamak ti aksidente.
Kunana nga adda metten ti katulagan dagiti dua nga agsinnungbangir a partido kalpasan a napagnunumoanda ti panagbinnayad ti magastos ti pannakatarimaan ti pannakadadael dagiti dua a lugan.
Naammoan nga awan ti impluwensiya ti nasanger dagiti dua a nangiturong ti SUV ken pick-up idi napasamak ti desgrasia.
Innayonna nga agpada a napitpit iti sango dagiti dua a maseknan a lugan gapu iti kinapigsa ti impact ti desgrasia.
