LAOAG CITY – Nagsagaba ti sugat iti likod ken adda ti tukkol iti akin-kannigid nga ima ti maysa a lalaki kalpasan a nadesgrasya iti paset ti Paoay-Currimao Road iti ili ti Paoay.
Binigbig ni Police Staff Master Sergeant Teddie Ocol, imbestigador iti PNP iti ili ti Paoay ti biktima a ni Jastin Mark Val Guarnino, addaan iti umno a tawen, taga Barangay Tapao-Tigue iti ili ti Currimao.
Segun ken ni Ocol, basar iti imbestigasyon da, agpapa-abagatan nga agawid iti balay da idi na-overshoot ti biktima iti nasipnget ken agkurba a paset ti kalsada a rason ti nagderderetsoan na iti poon ti G-melina.
Kuna na nga iti pannakaidungpar ti biktima iti poon ti G-melina ket naipurwan daytoy a nangitunda ti pangsagaba na ti sugat iti likud ken tukkol iti akin-kannigid nga ima na.
Naitaray a dagus ti biktima iti Mariano Marcos Memorial Hospital and Medical Center iti ciudad ti Batac ken idi agdama ket manarimaan pay laeng ti panagpapaimbag na.
Innayon ni Ocol a nakahelmet ken saan a nakainom ti arak ti biktima idi napasamak ti insidente.
