LAOAG CITY – Manarimaan a maag-agasan ti maysa a lalaki kalpasan a binagkong ti mismo a kabsat na idiay Brgy. Acnam, Nueva Era.
Nabigbig ti biktima a ni Rocky Manglana, agtawen ti 31, awanan ti asawa idinto a ti suspek ket ni Crisanto Manglana.
Segun kenni Senior Inspector Erwin Bolibol, hepe ti Nueva Era PNP, mapan kuma makiay-ayam ti biktima iti minatayan ngem inbaga ti suspek a saan a mapanen gapo ta maabak to met laeng.
Gapo iti daytoy, nagriri dagiti agkabsat a nangitunda ti panangbagkong ti suspek iti kabsat na.
Dagos met a naitaray ti biktima iti Mariano Marcos Memorial Hospital and Medical Center iti ciudad ti Batac gapo ti sinagaba na a sugat ti bukot.
Ti agdama ket manarimaan pay laeng a birbiruken dagiti otoridad ti suspek ken manamnama a sumango ti kaso a frustrated homicide wenno frustrated parricide.
