LAOAG CITY – Manamnama a mapilaan ti kaso a Frustrated Homicide ti maysa a lalaki iti Brgy. 14, San Gregorio iti ili ti San Nicolas kalpasan ti panangbagkong na iti kabsat na.
Nabigbig ti biktima a ni Rick Bumanglag y Lagat, agtawen ti 43, naasawaan idinto a ti suspek a kabsat na ket ni Guillermo Bumanglag y Lagat, agtawen ti 40, naasawaan ken agpada dagitoy a residente ti nadakamat a Barangay.
Basar iti imbestigasion dagiti otoridad, tinawagan ti biktima ti suspek tapno alaen ti mountain bike daytoy nga inusar ti kabsat na.
Nupay kasta, apaman a simmangpet ti suspek iti pagtaenganda a naggapu iti pagiinuman iti Brgy. 11 iti ili ti San Nicolas ket adda ti nabara a panagsinnungbat dagiti agkabsat iti saan pay a masinunuo a rason.
Naamoan pay a ginandat ni Flordeliza Clete y Bumanglag, kabsat dagiti maseknan nga anawaen dagitoy ngem gapu iti kinapigsa da ken pannakarikna ti nerbyos ket simrek iti kuartona.
Idi rumuar ni Flordeliza iti kuartona ket nakita na ti biktima a ni Rick a madigdigos babaen iti bukod na a dara.
Mainaig iti daytoy, idi nakaawid ni Jose Clete y Avila, asawa ni Flordeliza ket dagusda nga intaray ti biktima iti Governor Roque Ablan Sr. Memorial Hospital para iti naan-anay a pannakatamingna.
