LAOAG CITY – Natay ti maysa a lalaki idinto a nasugatan ti maysa iti panagdinnungpar ti dua a motorsiklo iti paset ti Barangay Buduan, Burgos, Ilocos Norte.
Nabigbig ti pimmusay a biktima a ni Alvin Jay Sabado, driver ti maysa a motorsiklo ken residente imet laeng iti nadakamat a barangay idinto a ti nasugatan a nangiturong met ti maysa a motorsiklo ket ni Jake Banut, taga Butao, Calanasan, Apayao.
Inbatad ni Police Corporal Kingsley Luna iti PNP-Burgos, iti inisyal nga imbestigasyon da, agpada nga agpapa-abagatan a direksyon ti dua a motorsiklo.
Naamoan nga agovertake koma ni Banut ngem kellaat a naglikko a nagpakannigid ni Sabado a nangitunda ti panagdinnungpar da.
Gapu iti napasamak, nagsagaba ti nakana a sugat ni Sabado idinto a ni Banut ket nagasat gapu ta saan a napakarwan.
Iti agdama, agtultuloy ti naiget nga imbestigasyon dagiti otoridad iti napasamak nga insidente.
