LAOAG CITY – Natay ti maysa a lalaki kalpasan a nadesgrasya iti Gilbert Bridge ditoy siudad ti Laoag.
Iti pakpakauna nga imbestigasyon dagiti kameng ti PNP Laoag, maysa a lalaki, nga adda iti umno nga edad a residente iti ili ti San Nicolas ken nangiturong iti nagmaris orange a mio motorcycle nga addaan ti plate number 0101-0420946.
Bayat nga agpapaabagatan a direksiyon ti motorsiklo nga inturong ti biktima ket maipagarup a naisagirad daytoy iti akin igid a paset ti rangtay rason a nadesgrasya.
Naitupar iti railings ti ulo ti biktima a poon iti ipupusay daytoy.
Rumrumwar nga immabot iti 20 agingga iti 25 a metro ti skid mark idinto a mapatta-patta a 10 a metro iti pannakaipurwak ti motorsiklo manupid iti nakaidasayan ti biktima.
Naamuan ti Bombo Radyo Laoag nga adda ti kadua ti biktima a nagmaneho met iti sabali a motorisiklo ken maipagarup a naglumba dagitoy bayat iti panagawid da iti siudad ti Batac.
Maipagarup pay nga adda iti impluwensya ti nasanger ti biktima gapu ta naggapu da iti ili ti Bacarra.
