LAOAG CITY – Natay ti maysa a lalaki kalpasan a nadesgrasya iti Manila North Road, bisinidad ti Barangay 11, San Fernando iti ili ti San Nicolas.
Nabigbig daytoy a ni Gerard Andres y Dizon, agtawen ti 34 ken residente iti 105 Gen. Segundo Ave. ditoy ciudad ti Laoag ken isu ti nagmaneho iti motorsiklo.
Iti imbestigasyon ti PNP-San Nicolas, nakadinnungpar ni Andres ti driver ti Mitsubishi Adventure a ni Jojo Reyes y Badua, agtawen ti 42, awanan ti asawa ken residente iti Barangay 12 iti nasao nga ili.
Basar iti PNP, agpaamyanan ni Reyes ngem iti agpaluden ket kellaat a dinungpar ni Andres a nangitunda ti panagsagaba daytoy ti sugat iti nagduduma a paset ti bagi na.
Dagus met naitaray iti Gov. Roque Ablan Senior Memorial Hospital ditoy ciudad ti Laoag ngem naideklara a dead on arrival daytoy.
Kalpasan daytoy ket adda ti panagsasarita dagiti dua a partido mainaig iti daytoy a banag.
