LAOAG CITY – Natay ti maysa a lalaki kalpasan a nagsarili ti naglugananna a motorsiklo iti Brgy. Caray iti ili ti Nueva Era.
Segun ken ni P/Capt. William Sotelo, Hepe ti Nueva Era Municipal Police Station, nabigbig ti biktima a ni Eulizes Mendoza, agtawen iti 23 ken residente ti Brgy. Cabittauran iti nasao met laeng nga ili.
Inbatadna a basar iti inwayatda nga imbestigasion, napan naginom ti biktima kaduana ti barkadana iti maysa a tiangge.
Kunana nga apaman a naibosna ti ininomna nga arak ket napan naglugan ti motorsiklona a Suzuki Raider ken kellaatna daytoy a pinataray nga agpa-laud.
Gapu iti daytoy, inpalgakna a nagdirdiretso daytoy nupay adda ti kurbaan a paset ti kalsada ti nagdalyasatanna a nangitunda ti pannakatennagna iti pagunasan.
Nagsagaba ti nakana a sugat iti nagduduma a paset ti bagi ti biktima kangrunaanna ti ulo daytoy.
Naitaray iti kaasitgan nga ospital ti biktima ngem naideklara a dead on arrival babaen iti Attending Physician a ni Dr. Evelyn Dela Cruz.
Innayonna a sakbay ti napasamak nga insidente ket rumrummuar a napan pay nakiinom ti biktima iti sentro iti ili ti Nueva Era.
