LAOAG CITY – Natay ti maysa a lalaki kalpasan a nauram ti maysa a pagtaengan iti Brgy. Naguillan iti ili ti Nueva Era.
Nabigbig ti biktima a ni Jeremias Ramirez y Damaguing, agtawen ti 63, naasawaan ken residente iti nasao a barangay.
Segun kenni SFO2 Reynante Bismonte, municipal fire marshal iti nasao nga ili, maipagarup nga agmaymaysa ni Ramirez iti uneg ti pagtaengan da idi rabii.
Kuna ni Bismonte, saan a nakaruwar ti biktima gapu ta maipagarup nakaturog ken adda iti impluwensya ti nasanger.
Basar iti inisyal nga imbestigasyon, napan nakiinom ti biktima iti karruba da idi rabii.
Kabayatanna, idi nagresponde dagiti kameng ti Bureau of Fire Protection ket nauramen ti pagtaengan agraman ti biktima.
Innayon ni Bismonte a possible nga iti uneg ti pagtaengan ti namunganayan ti uram.
