LAOAG CITY – Natay ti maysa a lalaki kalpasan a nalmes iti Subli-Subli beach iti Barangay Salugan iti ili ti Currimao.
Nabigbig ti biktima a ni Brenier Jake Bacud y Danipog, agtawen ti 32, naasawaan, driver iti St. Nicholas Steel Trading ken residente iti Barangay Nagbacalan iti ili ti Paoay.
Iti imbestigasyon, napan nagdidigus ti biktima ken dua pay a kakadwa na iti baybay a sakop iti Barangay Victoria iti ili ti Currimao kabayatan a nakainom dagitoy iti nasanger.
Kalpasan ti sumagmamano a gundaway ket nagdesisyon dagiti kakadwa ni Bacud nga agsublin iti inupaan da a cottage ngem nagbati ti biktima.
Naamoan a kalpasan ti sumagmamano a minutos ket nagbalaw ti maysa a kadwa ni Bacud gapu ta saannan a makita daytoy.
Insigida a napan da nagreport iti kwerpo ti pulisya no sadinno nga inkoordinar da a dagus daytoy iti opisina ti Philippine Coastguard ken PNP-Maritime.
Nagresponde a dagus dagiti kameng ti PNP-Currimao, PCG ken PNP-Maritime no sadinno a nakita ti bangkay ni Bacud iti baybay a sakop ti Barangay Salugan iti nasao nga ili.
Inpasingked ni Doctora Maria Cristima Pingao, ti Municipal Health Officer iti ili ti Currimao nga iti panangeksamen na ti bangkay ni Bacud ket awan ti nakita na a foul play iti pannakalmes ti nasao a biktima.
