LAOAG CITY – Natay ti maysa a lalaki kalpasan a napalto-paltogan bayat a nakalugan ti inturong na a tricycle iti Brgy. Sta. Cruz iti ili ti Badoc.
Nabigbig ti biktima a ni Eduard Inay y Pagdilao, agtawen ti 37, naasawaan, partidor ken residente iti Brgy. Sabangan iti ili ti Sinait, Ilocos Sur.
Iti pakpakauna nga imbestigasyon, nakita dagiti sinagaba a tama ti biktima, dua iti ulo na, dua iti akin kannigid nga ima, maysa iti akin kannawan nga ima, dua iti barukong, ken dua iti buksit na.
Naitaray ti biktima iti Corpuz Clinic iti ili ti Sinait ngem naideklara a dead on arrival.
Basar iti PNP Badoc, awan pay ti pakabigbigan dagiti suspek a nangpalto-paltog kenni Inay.
