LAOAG CITY – Inbatad ni PLt. Godefredo Ribuyaco, Deputy Chief iti PNP San Nicolas nga agtultuloy ti imbetigasyon iti napasamak a pammaltog iti Brgy. 6 iti nasao nga ili a rason ti nakatayan ni Antonio Bonilla, agtawen ti 49 ken residente iti nadakamat a barangay.
Segun ken ni Ribuyaco, pasado alas-diyes idi rabii idi napasamak ti insidente.
Kuna na a daytoy ket kabayatan ti panaggi-inom da Bonilla ken dagiti kaubraan na nga isuda Michael Aceret kenni Emmanuel Garcia.
Inbaga na a kabayatan ti panagi-inom da ket napan imisbo ni Bonilla iti asideg ti kamamaisan.
Kabayatan ti panagisbo na ket dita a kellaat a napaltugan ken in-inot a naglusdoy kalpasan nga inpakaamo na kadagiti kainnoman na a napaltugan.
Inpakaamo ni Ribuyaco a nagsagaba ti biktima iti tama ti bala iti panga ken dua iti bagi na a rason di dagus nga ipupusay na.
Mainaig iti daytoy, kuna ti deputy chief a posible a shot gun ti nausar iti nasao a pammaltog.
Innayun na a riri ti daga ti kitkitaen da a rason nu apay napasamak ti insidente.
Agtultuloy met ti pannagbirok dagit ortoridad iti nakalibas a suspek a maipagrup a naglemmeng iti kamamaisan.
