LAOAG CITY – Natay ti maysa a lalaki kalpasan a pinalto-paltogan ti riding-in-tandem suspect iti paset ti C5 road iti Brgy. 20 San Jose iti ili ti Sarrat.
Segun kenni Mr. Jose Doropan, residente iti nasao a lugar, bayat a kasarsarita na ti kayong na ket nakangeg da iti putok ti paltog manipud iti kalsada.
Nakita na dagiti dua a nakalugan iti maysa a nangisit a motorsiklo a nagpaamianan a direksyon ngem saan na a nailasin dagiti maseknan gapu ta nakasuot da iti helmet.
Rumrumwar nga agpaabagatan met a direksyon ti biktima a ni Rodante Botanes y Corales, a residente iti Brgy. Medina iti ili ti Dingras.
Iti nakalap nga impormasyon ti Bombo Radyo, innem a tama ti bala ti paltog ti sinagaba ti biktima idinto a 12 a kapsula ti bala ti saan pay a nabigbig a klase ti paltog.
Naitapuak ti biktima ken ti naglugnan na a motorsiklo kalpasan ti insidente.
Agtultuloy naun-uneg ti imbestigasyon ti PNP Sarrat mainaig ti motibo ti pammaltog.
