LAOAG CITY – Inulod ti maysa a kotse ti maysa a lalaki a nabartek bayat a nakadasay iti national highway iti Brgy. Baay iti siudad ti Batac.
Pimmusay ni Cesar Rowful Mindana, agtawen ti 44, awanan asawa, laborer, tubo iti Cantilan, Surigao del Sur ken agnanaed iti pagtaengan ti agnagan iti Rowena Angcog iti nasao a barangay.
Iti imbestigasyon, bayat nga agpapaamian a direksiyon ti kotse nga inturong ni Roger Nartatez y Llanes, agtawen ti 38, ken residente iti Labut Sur, Santa, Ilocos Sur ket maipagarup a saan a nadlaw ti driver ti biktima a nakadasay iti tengnga ti kalsada.
Gapu iti daytoy, naklaat lattan ti driver a nakita na ti biktima a maul-ulod iti sirok ti lugan na kalpasan a naibaga kenkuana dagiti motorista.
Dagus a bulontaryo a simmuko iti PNP San Nicolas.
Naitaray ti biktima iti Mariano Marcos Memorial Hospital and Medical Center iti nasao a siudad ngem naideklara a dead on arrival.
Kabayatanna, inpakaammo ni Police Lt. Col. Michael Agoncillo a nagtalinaed ni Nartatez iti kustidyar ti maysa nga huwes idinto a naipakustudyar ti kotse iti PNP San Nicolas.
Inbatad na a possible a nakadasay ti biktima idi inalud-od ti kotse gapu ta awan dagiti aniaman a kuppit iti sango ti kotse.
Possible a sumango ni Nartatez ti kaso a reckless imprudence resulting to homicide.
