LAOAG CITY – Natay ti maysa a lalaki kalpasan a napltogan iti ili a Dingras.
Iti nakalap nga impormasyon ti Bombo Radyo Laoag, ti biktima ket agnagan ti Emmanuel Tamayo, agtawen ti 57, residente ti Brgy. Capasan iti ili a Dingras.
Immuna iti daytoy naitaray ti biktima iti Dingras District Hospital ngem indeklara ni Dr. Ann Corpuz a dead on arrival.
Nagsagaba ti biktima iti dua a tama ti bala ti paltog iti barukong na.
Kabayatanna, inlawlawag ni Mrs. Criselda Tamayo, asawa ti biktima a ginandat na a bagkongen ni SPO2 Ramil Belong iti PNP Dingras rason nga pinaltogan na ti biktima.
Daytoy ket kalpasan a nagpatulong ti misis kadagiti opisyal ti barangay ken naayaban da ni Belong.
Immuna iti daytoy, inbatad ni Tamayo a nagkarkarit ti asawa na bayat nga adda iti impluwensya ti nasanger ken nakaiggem ti kutsilyo.
Nupay kasta, napagkalma da daytoy ngem kalpasan ti sumagmamano a kanito ket nagkarkarit manen ken ditoy a napasamak ti pannakapaltog ti asawa na.
Mainaig iti daytoy, awan ti plano ni Tamayo nga agpila ti reklamo kontra ti pulis a nangpaltog iti asawa na.
Naamuan nga agkarruba da Belong ken ti biktima.
