LAOAG CITY – Emosyonal ni Mrs. Fe Salvador kalpasan a nabirokan a nalamiisen a bangkay ti asawa na iti Brgy. Vira ditoy siudad ti Laoag.
Nabigbig ti biktima a ni Benigno Salvador y Cristobal, agtawen ti 64, naasawaan ken mannalon kalpasan a pinooran na ti bagbagi na babaen dagiti nabunton a garami iti kataltalonan a paset ti nasao a barangay.
Kuna na a nangrugi a sinarak da ti asawa na idi alas dos ti parbagon ken nabirokan da kalpasan ti nasurok dua nga oras.
Segun kenni Mrs. Salvador, problema ti asawa na ti panangloko ti agnagan ti Larry ken Andres maipanggep ti daga.
Mainaig iti daytoy, nakabirok dagiti otoridad ti kasa puego iti asideg ti nakapooran ni Benigno Salvador a taga Brgy Vira ditoy siudad ti Laoag.
Daytoy ti kinumpirmaran ni Insp. Nilo Domingo iti Scene of the Crime Operatives.
Kuna na a nakarekobre da ti paris ti tsinelas ti biktima ken ti bado a nauram.
Kabayatanna, saanen nga interesado ti pamilya ti biktima a maidalan iti otopsiya ti bangkay ti biktima.
Kuna ni Mrs. Fe Salvador nga sipud iti pannakaloko na mainaig ti daga ket napukaw ti panunut ti biktima.
Saan a ninamnama ni Salvador a nagpakamatay ti asawa na.
