LAOAG CITY – Maisagsaganan ti reklamo a maipila kontra ti natiliw a lalaki babaen ti naiwayat a drug buy bust operation iti Brgy 4. San Francisco, iti ili a Sarrat.
Nabigbig ti suspek a ni Emerson Guerero, agtawen ti 49, residente ti Brgy. 3 iti ili a Sarrat.
Nakumpiskar dagiti kameng ti PNP ti maysa a sachet a naglaon ti maipagarup a shabu, ken 500 pseo bill a buy bust money.
Malaksid ti naala iti transaksyon, nakumpiskar pay ti dua a sachet a naglaon ti maipagarup a shabu, kalibre 22 a paltog, sumagmamano a drug paraphernalia, ken ti kurong-kurong a nagluganan na.
Iti nakalap nga impormasyon ti Bombo Radyo Laoag maikalima ti rango ni Guerero iti listaan ti PNP Sarrat.
Inlawlawag ni Police Chief Insp. Roldan Suitos, hepe ti PNP Sarrat a ti natiliw a suspek ket dati a drug surenderer ken nagturpos iti naisayangkat nga Community Based Rehabilitation Program.
Kinumpirmaran na a saan pay a nagsardeng ti suspek iti aktibidad na mainaig iti iligal a druga.
Segun kenni Suitos, bigbigbigen dagiti sabsabali nga surenderers ti suspek ken maibilang kadagiti kapigsaan nga agop-operar iti nasao nga ili iti kallabes.
Inpakaammo na a gandaten ti suspek nga apsuten ti paltog manipud iti beltbag na.
Ibilang ni Suitos a pammaneknek nga adu dagiti nagsubli iti iligal a bisyo babaen ti pannakatiliw ni Guerero a residente ti Brgy. 3, rank 5 iti listaan dagiti drug personalities ken nagturpos iti Community Based Rehabilitation Program ti gobyerno.
