LAOAG CITY – Balligi ti naiyuswat nga entrapment operation kontra ti lalaki a naglako ti paltog iti pulis a nagpammarang a gumatang ti paltog idiay Sarrat, Ilocos Norte.
Binigbig ni Police Chief Inspector Roldan Suitos ti lalaki a ni Wilson Domingo, agtawen ti 53 ken taga Brgy. 16, Sto. Santiago iti nasao nga ili.
Nakumpiskar manipud kenni Domingo ti caliber 38, walo a bala ti M14, lima a bala ti carbin ken sachet a naglaon ti maatap a shabu.
Segun kenni Suitos, ti nasao a suspek ket adda iti drug watchlist ken dati a naoperasyonan ti search warrant idi tawen 2015.
Kabayatanna, kuna ni Suitos nga adda ti dimmanon kenkuada nga impormasyon a ti suspek ket maipagarop nga agrec-recruit ti agbalin a miembro ti New People’s Army (NPA).
Nupay kasta, inbatad ni Suitos nga ival-validate da pay laeng ti nasao nga impormasyon.
