LAOAG CITY – Kinumpirmaran ni Police Captain Eddie Suyat, Officer In Charge ti PNP-Paoay ti pannakatiliw ti maysa a lalaki iti nasao nga ili.
Nabigbig ti suspek a ni Cesar Oaquera, agtawen ti 30, awanan asawa, awanan trabaho ken residente ti Brgy. 6 iti nadakamat nga ili.
Daytoy ket kalpasan ti naiparuk-at a Warrant of Arrest babaen kenni Honorable Felix G. Salvador, Presiding Judge of RTC, Branch 19, Bangui, Ilocos Norte.
Segun ken ni Suyat, naarestar ni Oaquera gapu ta daytoy ti nagiturong ti nagluganan da a Toyota Innova a naidungpar iti Buraan Bridge iti Brgy. Ablan iti ili a Burgos a nakatayan dagiti tallo a kakadua na, innem a bulanen ti napalabas.
Inpakaammo na a sumango ti suspek ti kaso a Reckless Imprudence Resulting in Multiple Homicide and Physical Injuries.
Nairekomendar nga agpiyansa ni Oaquera ti innem a pulo a ribu a pisos (60,000) para iti temporario a pannakawayawaya na.
Inbatad met ni Police Staff Jimmy Hufancia Jr. iti PNP Burgos a dagiti nakalugan a nakalasat iti nasao a desgrasia idi Mayo 14 iti agdama a tawen ket da Art Ganyela, agtawen ti 22, Marie Peralta, agtawen ti 50, Kurt Peralta, agtawen ti 18, Julius Ian Peralta, agtawen ti 20 idinto a dagiti tallo a pimmusay ket da Florida Peralta, agtawen ti 75, Rodolfo Peralta, agtawen ti 53 ken Arvhenz Maderano, agtawen ti 6 nga agpapada a taga Brgy. 27, Maligaya Street, Bonoan Guiset, Dagupan City idiay Pangasinan.
Karaman pay ditoy a nakalugan da Philip Enrick Lam, agtawen ti 10 ken Patrick Lam, agtawen ti 18 nga agpada a taga Sta. Rita iti ili a Paoay.
Inlawlawag ni Oaquera, bayat a dumaldalyasatda ket kellaat lattan nga adda limmasat a lalaki rason ti saannan a maikontrol ti manibela a nangitunda ti pannakaidungparda iti Buraan Bridge iti Brgy. Ablan iti ili a Burgos.
Iti agdama ket addan iti pagbaludan ti nasao a suspek.
