LAOAG CITY – Natiliw ti maysa a lalaki gapo iti panagprobokar na ken maipagarop a panangdangran na iti maysa a kameng ti pulisya iti Brgy. 23, Sta Cecilia, San Nicolas, Ilocos Norte.
Nabigbig daytoy a ni Bernard Masil y Tomas, agtawen ti 49 , naasawaan ken residente iti Brgy. 13 ditoy ciudad ti Laoag.
Basar iti imbestigasyon ti PNP-San Nicolas, nagprobokar ni Masil iti pagtaengan ni Erinio Mamuad y Duldulao iti saan pay a masinunuo a rason.
Ginandat ni Brgy. Kagawad Elmer Longboy y Lumabau, agtawen ti 48 ken dagiti karruba ni Manuad nga anawaen ni Masil ngem saan a nagsardeng daytoy isut gapo na a timmawag da iti PNP-San Nicolas.
Naaktuan met dagiti kameng ti pulisya ti panagprobokar ti suspek ken kinsarita da daytoy ngem saan latta a nagsardeng ken intuloy na ti nagpukpukkaw.
Naamoan nga idi arestaren dagiti pulis ni Masil ket nagresistir ken maipagarop a kinugtaran na ti luppo ti maysa kadagiti pulis.
Nupay kasta, nagballigi met laeng dagiti pulis a nanggammat it suspek ket naikabil iti Gov. Roque Ablan Sr. Memorial Hospital para iti medical examination ken iti agdama ket addan iti kustudiyar ti PNP-San Nicolas bayat a maisagsaganan ti kaso a panaglabsing iti Article 148 wenno Direct Assault ken Article 151 wenno Resistance and Disobedience to a person in Authority iti Revised Penal Code.
