LAOAG CITY – Nagtalinaed iti kustudiyar ti PNP-Laoag ti maysa a lalaki kalpasan a nagprobokar ken panagarmar na ti replica ti paltog.
Nabigbig daytoy a ni Jesus Tumbaga, agtawen ti 37, tubo idiay ili ti Sinait ngem agnanaed iti Brgy. Nalbo ditoy ciudad ti Laoag.
Segun ti imbestigasyon, prinobokar na ti agnagan Ruben Baay Trinidad, agtawen ti 47, awanan ti asawa ken tubo idiay ili ti Burgos ngem agnanaed met laeng ditoy ciudad ti Laoag.
Naamoan a parparwaren ti suspek ti biktima iti kuarto ti apartment da tapno paltogan na.
Nupay kasta, saan a rimwar ti biktima ken timmawag iti pulisya tapno agpatulong.
Gapo iti daytoy, natiliw ti nasao a suspek pakiaramanan ti replica ti paltog.
Awan met ti ammo ti biktima a rason tapno probokaren ti suspek isuna.
Manamnama met a maipila ita nga aldaw ti kaso a comelec gun ban kontra iti nasaoa a suspek.
